കൊച്ചി: ജെ.ബി. കോശി കമ്മീഷന് റിപ്പോര്ട്ട് പ്രസിദ്ധീകരിച്ചത് സ്വാഗതാര്ഹമെന്ന് സീറോമലബാര് പബ്ലിക് അഫയേഴ്സ് കമ്മീഷന്. സംസ്ഥാനത്തെ ക്രിസ്ത്യന് ന്യൂനപക്ഷങ്ങളുടെ വിദ്യാഭ്യാസ സാമ്പത്തിക പിന്നാക്കാവസ്ഥ, ക്ഷേമം, സര്ക്കാരുമായി ബന്ധപ്പെട്ട് ക്രൈസ്തവ വിഭാഗങ്ങള് അനുഭവിക്കുന്ന അനീതികള് എന്നിവയെക്കുറിച്ചു പഠിക്കുന്നതിനായി നിയോഗിച്ച ജസ്റ്റീസ് ജെ.ബി. കോശിയുടെ അധ്യക്ഷതയിലുള്ള കമ്മീഷന്റെ റിപ്പോര്ട്ട്, സംസ്ഥാന മന്ത്രിസഭ അംഗീകരിക്കുകയും പ്രസിദ്ധീകരിക്കുകയും ചെയ്തിട്ടുണ്ട്.
കമ്മീഷന് റിപ്പോര്ട്ട് പൂര്ണമായും പ്രസിദ്ധീകരിക്കുകയും അതിലെ ശിപാര്ശകള് ക്രൈസ്തവ സഭാ നേതൃത്വങ്ങളുമായി ചര്ച്ച ചെയ്തു നടപ്പാക്കുകയും വേണമെന്ന് സീറോമലബാര് സഭ ദീര്ഘനാളുകളായി ആവശ്യപ്പെട്ടിരുന്നു. കാലതാമസമുണ്ടായെങ്കിലും ഈ റിപ്പോര്ട്ട് അംഗീകരിക്കുകയും പ്രസിദ്ധീകരിക്കുകയും ചെയ്ത സര്ക്കാര് നടപടിയെ സീറോമലബാര് പബ്ലിക് അഫയേഴ്സ് കമ്മീഷന് സ്വാഗതം ചെയ്യുന്നു.
കേരളത്തില് ക്രിസ്ത്യന് ന്യൂനപക്ഷങ്ങളിലെ വിവിധ വിഭാഗങ്ങള് അനുഭവിക്കുന്ന പിന്നാക്കാവസ്ഥകളും പ്രശ്നങ്ങളും ആദ്യമായി സമഗ്രമായി പഠിച്ചു റിപ്പോര്ട്ട് തയാറാക്കിയ ജസ്റ്റീസ് ജെ.ബി. കോശി, ഡോ. ജേക്കബ് പുന്നൂസ്, നിര്യാതനായ ഡോ. ക്രിസ്റ്റി ഫെര്ണാണ്ടസ്, കമ്മീഷന് സെക്രട്ടറി റിട്ട. ജഡ്ജി സി.വി. ഫ്രാന്സിസ് എന്നിവരുടെ സേവനങ്ങളെ സഭ ആദരവോടെ കാണുന്നു.
റിപ്പോര്ട്ടിലെ ശിപാര്ശകളില് നിലവില് നടപ്പാക്കിയവ വെബ്സൈറ്റില് പ്രസിദ്ധീകരിക്കാനും റിപ്പോര്ട്ടിന്മേലുള്ള സഭകളുടെ അഭിപ്രായം എഴുതി അറിയിക്കാനും മുഖ്യമന്ത്രിയുടെ അധ്യക്ഷതയില് ചേര്ന്ന വിവിധ സഭാപ്രതിനിധികളുടെ യോഗത്തില് തീരുമാനം എടുത്തിട്ടുണ്ട്. റിപ്പോര്ട്ട് ചര്ച്ച ചെയ്തു ശിപാര്ശകള് നടപ്പാക്കുന്നതിനുള്ള തുടര്പ്രവര്ത്തനങ്ങള് എത്രയും വേഗം ഉണ്ടാകണമെന്നും സീറോമലബാര് പബ്ലിക് അഫയേഴ്സ് കമ്മീഷന് ചെയര്മാന് ആര്ച്ച്ബിഷപ് മാര് ആന്ഡ്രൂസ് താഴത്ത് ആവശ്യപ്പെട്ടു.
Deepika
E-paper LOGIN
LOGIN
